【香港素食餐廳】純白窗口bar枱－Diff. Cafe

2020年12月24日
讀畢需時 2 分鐘

朋友因為全素經典千層麵而推薦要一試哩間係荃灣既cafe，除左全素千層麵佢地仲有其他素食選擇，都算係素食friendly既餐廳。我地揀左當日既Daily Special黑松露野菌薄餅同全素經典千層麵。

黑松露野菌薄餅🍕全素經典千層麵🍝 [Vegan 純素]

一見到份黑松露野菌薄餅即刻被吸引，因為係薄批而且好多好多菇菌係面！唔知大家食薄餅中意厚批定薄批？我個人就中意薄批因為個皮多脆口好似食緊脆片咁而且薄批份量無咁多可以食多幾塊，好似滿足感大啲但又唔會食唔落😛不過相信哩個係女仔既角度，唔知男仔係咪都會覺得薄批吸引過厚批呢？講翻哩個黑松露野菌薄餅先，佢食落口係好脆而且佢加左啲沙律醬（應該係千島醬），好開胃唔會覺得腬，令人食完一塊會想食另一塊！你見到佢有好多黑松露同野菌係面，絕對係足料薄餅。好推薦大家揀哩個薄餅😋

全素經典千層麵用左素肉黎整個蕃茄醬，有食過素肉既都知道而家素肉既口感同肉係接近完全一樣，所以佢個蕃茄醬真係同平時一般肉醬既口感味道差唔多完全相同！不過唔知係咪因為黑松露野菌薄餅太岩口味同夠大份，所以食完薄餅再食千層麵就覺得千層麵比較普通。但係但係，佢地既千層麵都係好食既！Lunch set仲有水果茶可以揀，當日係芒果茶好好味😋