【香港素食餐廳】日式素食定食－MUM日常野菜料理

有幾次想試哩間MUM日常野菜料理都因為佢就收工而無去到。今次咁岩去開油麻地個頭就行左去試下，MUM日常野菜料理係逸東酒店LG既food hall入面。

價錢算係合理既日式素食定食，個人認為唔算好大份而食物質素幾好。定食可以揀3款餸或4 款餸亦可以加錢轉烏冬同配豆乳或杏仁奶，照顧到唔同人既需要。加上選擇都幾多，所以其實係會花多眼亂樣樣都想食。

因為我個日係tea time既午餐，所以就揀左3款。點左野菜天婦羅、本菇茶碗蒸同冷盤山葵鮮淮山，定食包括左五穀米、味噌湯同麥茶。

整體係比較淡，特別係味噌湯唔會好似出面個啲咁越飲越鹹。另外，茶碗蒸好嫩滑，而鮮淮山好清爽。見到menu仲有好多款素食想試，加上又見好多其他人話南瓜薯餅好食同豆乳好飲，所以會再去👍🏼

題外話：Eaton係一間非常值得我地留意既酒店，唔係佢地既豪華裝潢或者優質服務，而係佢地以關注社會、改變世界為目標既理念。如果大家有印象佢地有個好大既廣告板係有一句’What Does Your Revolution Look Like? ‘。雖然佢地經營酒店但同時佢地都利用緊哩個空間黎為社會帶黎變化。酒店大堂會有充滿藝術氣息風味，而Food Hall有種80年代電影既感覺，係一般香港酒店比較少見既設計。Eaton同Eaton Food hall入面仲有其他黃店，大家都可以去支持。

“Every time you spend money, you’re casting a vote for the kind of world you want” —Anne Lappe

---

MUM日常野菜料理

📍佐敦彌敦道380號香港逸東酒店LG樓8號舖

MUM Veggie Cafe

📍 Shop 8, LG, Eaton Hotel, 380 Nathan Rd, Jordan